Hoji ê Dia Nasional Di Peskadoris di Kabu Verdi

Segundu informason di Câmara de Comércio, Indústria e Turismo Portugal/Cabo Verde, zona ekonomika esclusiva di Kabu Verdi, k ta abarka oceanu k ta sirkunda nos país, ê di 734.265 km quadradus. Ês vasta ária ê un di kes ultimus zonas di peska subtilizadas. Ku efeitu, nos mar k ta cirkunda Kabu Verdi ka ta falta riquesa i variedadi, ainda k di densidadi fraka, ta abriga un grandi numeru di species marinhas. Zona entri ilhas di Sal, Boavista i Maio ê k ta representa maior plataforma kontinental i ku grandi konsentrasao di grandi parti di rekursus piskatorias di Kabu Verdi.

Mar ê fonti di sustentu di txeu familias di nos terra... piskadoris i kes k ta bendi pexi;

Mi ê fidju piskador, n cresci bera mar, n bendi peixi na ruas di São Filipe na Fogo desdi mininu te idadi di 18 ou 19 anus, só dipos k n decidi ba studa fora di Kabu Verdi k n pára di bai mar; mas kantu n ben di kursu, n bai Fogo i doz dia dipos, di madrugada, nba ku nha pai mar, nba djudal "bota" (pintxa boti na mar, sima nu ta fra na Fogo), pa ba lentra tempu; n durmi na kel areia friu baxu boti i n spera nha pai ben nu poi "bitxera" na kosta nu subi "txadona"; i foi mutu bon revive issu;

Kel fotu li ê de kel dia...


Mi ku nhas irmons nu ta labantaba cedu palmanha, txeu bes di madrugada, nu ta baba spera nos pai pega Txitxarru pa nu ba bendi di cedu, nu ta torna voltaba uns 11 (onzi) horas pa spera nos pai trazi pexi grandi (atun, serra, doradu, belfis, maragal, ...) nu ta bendeba te 12 (dozi) horas nu ta baba kasa prepara pa ba skola.

Mar foi fonti di sustentu di nos kasa te pokus meses atraz, kantu nha pai dixa di ba mar pamodi djel sta di idadi avansadu i el staba ta bai mar el so; issu staba ta ser mutu arriskadu, txeu bes boti kebra nos frenti i nu konversa kuel k dja sta na hora di deixa kel vida la. Nta rekorda ku txeu sodadi di kes tempus la, k apesar di sufridu foi nos ganha pao pa sobrevivensia, i, grasas a Deus kel pon di kada dia nunka ka falta.

E nos k konxi mar desdi mininu, kantu tinha abundansia di peixi, sabe k hoji eh ka maz assin, dipôs k nos guvernu fika ta renda nos mar pa strangerus pexi kaba i kel poku k es ta pega ka sta da pa nada maz.

Ês vidiu li, gravadu pa Ocean Press, ta fala dissu:

Mas hoji ê ka dia di kulpa guvernu, hoji ê Dia Nasional di Peskadoris di Kabu Verdi i pessoalmenti nke fra pa tudu piskadoris di Kabu Verdi parabens pa ses dia, mesmu ignoradus pa txeu di nos i nos propi guvernu, ês homis i mudjeris meresi nos ruspetu pa ses trabadju pa sustentu di ses familia i pa k tenha pexi na nos merkadu i k nhos lenbra k ten txeu fidju k ten orgulhu di nhos pa kenha k nhos é i k nhos ta representa pa nos.

Felis Dia di piskadoris di Kabu Verdi...

Com informason di Ocean Press

Olhar Cabo Verde Portal de Informações sobre Cabo Verde. Aqui você conhece Cabo Verde e fica de olho em tudo o que acontece no arquipélago.

0 Comentário

Enviar um comentário

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel