+Recentes »

latest

"Tranka Fulha" ê ka ramedi nen soluson pa Kornu

Keli ê un kritika a mensagi di ês musika, ê un vison pessoal di o k n entendi sobri ês letra i nha opinion sobri isso...

23 janeiro 2019

/ por Vagas
Tranka Fulha - Ramedi Kornu”, sertamenti dja bu obi ês musika pa li…

Ês musika ta retrata un supostu "diskuberta" pa resolvi problema di kornu na un relason, ô seja, ramedi pa traison.

Letra di musika ta fla k rapaz konquista un pikena, el konvidal pa ês ba fêsta, pikena aceita; na fêsta pikena fral k el ê bunitu, k el ta amal, el fazel juras di amor i el prometi ka largal... na un dadu mumentu el ta fla pikena pa speral bai rua el ta ben; kantu el ben el atxa pikena ku otu rapaz, txumadu di "makaku", ta trail. Inkomodadu ku ês situason el fika ta pensa na qual seria ramedi pa isso, i diskuberta foi o k inspira titulu di ês musika "Tranka Fulha - Ramedi kornu", na otus palavras “pega bu larga”, ô na un bom português “coma e jogue fora”.

Ten até un vidiu na Youtube undi autor di ês musika foi intrivistadu i el fala sobri isso, i o k ta da pa percebi ê k el ta fala dissu ku maior orgulhu, komo si isso ê algu bon, un diskuberta pa algun tipu di mal social.

Trank fulha ê ka un mensagi k debi ser ensinadu; ê ka un mensagi di orgulhu; tranka fulha ka ta kura prublema di kornu; traison ê un queston gravi na un relasionamentu i nunka el debi ser tratadu di forma tao banal assin;

Li na CV tudu dia nu ta obi storias di mortis por kausa di traison, txeu famílias distruidu por kausa di traison, txeu kriansas ta sufri i kria sem pai ô mai por kausa di kela i ainda nu kanta ku orgulhu k “tranka fulha” ê ramedi pa kornu?

Traison ê falta di carater, un mudjer ô homi k ta ten ruspetu pa família, pa un bon relasionamentu ka ta trai si kumpanheru, homi k ê homi ka ta trai se mudjer i visi versa; si relasionamentu dja txiga na un limiti k sta parci k traison ê un saida, midjor kusa k bu debi fazi ê deixa kel relason i bu bai vivi bu vida nton, pamodi parti maz tristi di traison ê k tudu kenha k ta trai sempri ta torna ben kasa, dja bu repara? Maridu ô mudjer ta sai i ba trai se kumpanheru ku otu alguen i dipos el ta torna ben pa kasa? Si traison ê ramedi pa bu relason pamodi k bu ka ta fika ku kel alguen k bu sai kuel? Pamodi k bu ten k torna volta pa kasa pa kel mesmu relason k bu ka kre maz? Issu ê pa nu ntendi k traison ka ten nada di bon nel em si, ê apenas un disfarci, un enganu pa nos cabesa di k dja parci un saida, mas k na verdadi nu ta torna volta pa kes mesmu kaminhu k nu bai... ora k isso sta kontici ê pamodi di un di kes ladus ka existi maz amor ô ruspetu pa kel relasionamentu i txeu bês ta parci k saída ê traison, mas traison nunka foi soluson, alias, so ta trazi mas sufrimentu.

Musika ta fala di traison na contestu di un relasionamentu entri un casal di namoradus, k a primera vista ê ka sima un relason di alguen kasadu i k ten fidju, mas mesmu assin traison ta soa di mesmu manera; traison ê traison, independentimenti di tipu di relason k nu sta nel ou di motivus k leba un a trai kelotu;

Ora k doz alguen sta djuntu debi ixisti amor i se un di kes partis sta ta trai ê pamodi ka existi mas kel amor ô ê apenas un jogu di interessi.

Ago será k pa resolvi ês situason nu ten k tranka i fulha nos kumpanheru? Ê issu k ta kura kornu?

Un pergunta k n gostaria di fazi ê o siguinti: tranka fulha podi ser ku bu filha? Quandu nu odja issu di pontu di vista di otu ta parci k isso ê k ê remedi mesmu, nu ta konkorda k si pikena trainu nu debi trakal i fulhal, mas dja bu txiga di pensa k ês mensagi ê un apologia a abuso sexual? Isso mesmu! Si bu intenson ê usa i bota fora ê isso k bu sta ta fazi. Ê mesmu kusa k abuza ou usa i joga fora komu si fossi diskartável. Isso ê kusa bon pa nu sta ta kanta ku orgulhu? Issu ê un kusa k nu gostaria k nos fidju aprendi ô k nu gostaria k alguen faze ku nos fidjus? Nu gostaria k alguen tranka i fulha nos filha, prima, tia, irmã, subrinha, …? Si bu risposta ê não, nton ka bu kanta ku orgulhu “Tranka Fulha” pamodi issu ê ka nenhum motivu di oruglhu; tranka fulha ê ka ramedi pa kornu.

Obi ês musika kompletu li i ka bu tranka i fulha fidju di ninguen:


Pensa nissu!
#IsaiasCardoso

Nenhum comentário

Postar um comentário

Não Perca:
© todos os Direitos Reservados
desenvolvido com por Kriolu Business